Tashmë është zyrtare, Tirana ka rinovuar kontratën me trajnerin Orges Shehi duke e lënë në krye të ekipi bardheblu dhe për sezonin tjetër.
Shehi u emërua në krye të skuadrës bardheblu në janar të këtij sezoni teksa arriti të bëjë mjaft mirë me Tiranën duke tentuar deri në fund Kupat e Europës madje për një moment u krijua dhe iluzioni i fitimit të titulli.
Lajmi e bëri të ditur vetë faqja e Tiranës në ‘’Facebook’’, duke i dhënë besim dhe për sezonin tjetër trajnerit durrsak.
Deklarata e klubit të Tiranës:
Orges Shehi, trajner i Tiranës!
Klubi i Futbollit Tirana njofton nënshkrimin e marrëveshjes me trajnerin Orges Shehi. Gjatë bisedimeve në ditët e fundit presidenca dhe trajneri Shehi arritën dakordësinë për zgjatjen e bashkëpunimit mes tyre. Pasi mori drejtimin e ekipit në Janarin e sezonit që lamë pas, duke bërë një punë mjaft të mirë me skuadrën në pak kohë, tekniku tashmë do të vijojë të qëndrojë në krye të bankinës bardheblu.
