Jasir Asani është një nga emrat më të lakuar në këtë periudhë merkatoje. Mëngjërashi ka kontratë me Partizanin deri në fund të majit dhe më pas del lojtar i lirë. Ende nuk ka vendosur për të ardhmen e tij, por burime të besueshme tregojnë se nga Turqia ka 3 oferta tunduese. Shifrat e çmendura të ofruara, kanë lëkundur 26-vjeçarin i cili duket se do t’i japë fund aventurës në vendin tonë.
Edhe pse në medie ishte përfolur që futbollisti kërkonte nga drejtuesit e kuq, 13 mijë euro rrogë, në fakt shifra të tilla s’janë bërë pengesë. Por, dëshira e Asanit për të provuar aftësitë e tij në një kampionat më të fortë, mund ta largojë atë nga Superliga shqiptare.
Vlen të theksohet se në vendin tonë prej disa ditësh ka mbërritur menaxheri i tij, Aleksandër Jovkov. Pritet me interes të mësohet se çdo të ndodhë, ndërsa zhvillime të rëndësishme do të ketë këto ditë në klubin e kuq.
