Ministri i Turizmit, Blendi Klosi, udhëtoi drejt Prishtinës për t’i joshur shqiptarët e Kosovës të kalojnë pushimet në bregdetin e Shqipërisë edhe këtë vit.
Por në takim me Besnik Bislimin, zëvendëskryeministër i Kosovës, Klosi u gjend pa fjalë përballë kërkesës së qeverisë së Kosovës për të hequr pagesën në “Rrugën e Kombit” për turistët nga Kosova.
Bislimi tha se kanë shtruar kërkesën që të gjendet një zgjidhje për taksën që turistët paguajnë në Shqipëri për “Rrugën e Kombit”.
“Kërkesën tonë që të gjendet në zgjidhje të paktën e përkohshme për eliminimin e detyrimit përkohshëm për të paguar për tunelin në Kalimash për arsye se kjo po shkakton vonesa. Rruga nga Kosova deri në destinacionet në Shqipëri dhe anasjelltas duhet të jetë sa më e lehtë. Duhet të gjendet një zgjidhje për eliminimin e detyrimit për të paguar për tunelin në Kalimash, që po shkakton vonesa për turistët tanë, të cilët ia mësyjnë Shqipërisë, e sidomos për pushime afatshkurtra”, tha Bislimi.
Taksa u vendos nga Qeveria Rama, ndërsa u pasua nga protesta të shumta, që u shuan nga ndërhyrja brutale e policisë, e cila arrestoi me dhjetra qytetarë kuksianë.
Në vizitën në Kosovë, ministri Klosi foli vetëm për rëndësinë e promovimit të turizmit të përbashkët, duke mos përmendur fare taksën prej 5 euro që paguhet në Kalimash.
“Për të dy qeveritë tona është një vendimmarrje e përbashkët që turizmi nuk është vetëm një kënaqësi, është një kontribuues i rëndësishëm në ekonomi dhe buxhetet tona. Prandaj, do të bëjmë gjithçka që oferta Kosovë-Shqipëri të jetë një realitet. Deti është i të gjithë shqiptarëve dhe bjeshkët po ashtu duhet ta shikojnë ofertën. Është e pafalshme që të kemi kufi edhe në bjeshkë. Folëm qartë që parqet tona të jenë parqe që nuk e njohin kufirin administrativ”, tha Klosi, duke shtuar se do të jemi bashkë për të ofruar një ofertë të përbashkët turistike.
Klosi ka shmangur totalisht çështjen e taksës në rrugën e Kombit, e cila rëndon mbi cilindo përdorues të kësaj rruge dhe trau i vendosur as më shumë dhe as më pak ngjan me një kufi shtesë mes shqiptarëve.
Ndoshta, ky moment, mund t´i shërbejë ministrave të tjerë të Qeverisë Rama që mund të vizitojnë Kosovën, për të qenë më të përgatitur për një çështje sensitive, e cila prek direkt xhepat e qytetarëve, ndërsa i shërben koncensionarit. Duket se më e rëndësishme se një apo dy ministra, qoftë edhe nga Kosova, që Rama mund të promovojë në qeverisjen e tij, kërkesa që vjen nga Prishtina, mbetet e njëjtë: heqja e taksës dhe traut.
