Kolegji Zgjedhor vendosi rrëzimin e ankimimeve për rezultatin e zgjedhjeve në qarkun e Gjirokastrës. Më herët, Kolegji rrëzoi edhe kërkesën e Partisë Demokratike për të marrë prova shtesë për shqyrtimin e pavlefshmërisë zgjedhore në Gjirokastër.
Pas rrëzimit në Komisionin e Ankimeve dhe Sanksioneve të pretendimeve të partive të opozitës për shpalljen e pavlefshme të zgjedhjeve të 25 prillit, PD e LSI vendosën ta çojnë çështjen në Kolegjin Zgjedhor.
Partia Demokratike ka dërguar një dokument me 600 faqe shpjegime dhe 450 prova shkresore, foto dhe video. PD kërkon përsëritje të procesit zgjedhor në shumë qarqe, pasi pretendohej se kishte fakte për blerje të votave dhe prani të fletëve të pavlefshme të votimit.
Më herët, KAS i dha fund procesit te ankimimit te zgjedhjeve te 25 prillit, duke u shprehur me vendim edhe për 3 kërkesat e fundit. KAS rrëzoi pretendimet e Partisë Demokratike dhe LSI për qarqet e Korçës, Elbasanit dhe Fierit, ku kërkohej shpallja e pavlefshmërisë së rezultatit zgjedhor. Si rrjedhojë, për këto qarqe, mbetet në fuqi rezultati paraprak i shpallur nga Komisioneri Shtetëror i Zgjedhjeve.
Lexo edhe:
Kolegji Zgjedhor rrëzoi ankimin e PD për Gjirokastrën, Kaso: Do e çojmë betejën deri në fund
