Avokati i PD në KAS: Drejtori i Burgut të Fierit u kërkoi punonjësve dhe të burgosurve të votojnë Ruçin

Avokati i PD Marash Logu akuzoi sot në KAS drejtorin e burgut të Fierit, Arjan Hasani, që sipas tij u ka kërkuar drejtuesve dhe të burgosurve që të votojnë për Gramoz Ruçin, kandidatin numër 10 në listën e PS-së.

Drejtori i Burgut të Fierit, Arjan Hasani, ju ka kërkuar drejtuesve dhe punonjësve të këtij institucioni por edhe të burgosurve që të votojnë për numrin 10 në qarkun Fier, numër që mbahet nga kryetari i Parlamentit, Gramoz Ruci. Nga tabela rezulton se ka pasur 67 vota për PS-në në këtë qendër votimi, nga të cilat 26 i ka marrë Gramoz Ruçi, çka në vlerësimin tonë provon që ka pasur një orientim të qartë për të votuar numrin 10 të listës së PS në qarkun Fier”, tha Logu.

Po ashtu, avokati i PD-së pretendon se ka një rritje të numrit të votuesve në fshatin Buzmadh, ku sipas Logut në këtë fshat ka pasur persona të punësuar në administratë.

Sa i takon fshatit Buzmadh ka një rritje të numrit të votuesve për PS-në. Në fshatin Buzmadh ka pasur 153 për PS sot ka 194. Banorë të fshatit Buzmadh që janë punësuar në administratën publike kanë ndikuar. Këto dy prova konfirmojnë pretendimet që janë ngritur nga PD”, tha ai.