Është vetëdorëzuar në Polici shtetasi Agis Vathi, i cili u përfshi në aksident mëngjesin e sotëm në aksin Laç-Mamurras, ku mbeti i vdekur 45-vjeçari Besim Seli. (Lexo edhe ketu lajmin)
Burime bëjnë me dije se Vathi ishte larguar nga vendi i aksidentit, për shkak se në afërsi ndodhej banesa e viktimës, dhe ai i druhej një përplasje me familjarët e tij.
Pas ngjarjes ai ka vendosur që të vetëdorëzohet, ndërsa Policia e ka ”shitur” si një arrestim mbërritjen e tij në komisariat.
Tashmë janë duke vijuar hetimet për aksidentin tragjik. Vathi po drejtonte mjetin e tij Benz, në momentin kur ka përplasur motorin që drejtohej nga Seli, ndërkohë që edhe makina pas manovrës ka përfunduar në kanal.
“Në vijim të informacionit paraprak, ju bëjmë me dije se drejtuesi i mjeti tip “Benz” shtetasi A.V.,i cili ishte larguar nga vendngjarja është kapur dhe shoqëruar në Komisariatin e Policisë Lezhë, për veprime të mëtejshme”, njofton zyrtarisht policia.
Si viktima ashtu dhe drejtuesi i mjetit Benz ishin të njohur mes tyre, pasi banonin në fshatin Gjorm të Kurbinit. /Faxnews/
