Nga Dibra, ku ka vijuar takimet me anëtarët e PD, në kuadrin e fushatës për zgjedhjen e 13 qershorit, ku përmes parimit 1 anëtar, 1 votë do të vendoset për kreun e ri të Partisë Demokratike, Lulzim Basha, u shpreh se këtu shteti i bëri njësh me partinë dhe krimin dhe mori format më të ashpra për të na goditur.
Basha ka vijuar me akuzat për zgjedhjet e 25 prillit, ku PD humbi përballë Kryeministrit Edi Rama, ndërsa tha se procesi nuk kishte asnjë lidhje me demokracinë.
“Ne e dinim që po futeshim në një betejë të pabarabartë dhe për këtë nuk kishim asnjë fije dyshimi, një një betejë që s’kishte lidhje me rregullat normale të demokracisë. Por fakti është që ne u futëm apo kështu me besimin e madh se mobilizimi i strukturave tona, ase bashkimi rreth vlerave tona do të të frymëzonte një dallgë të ndryshimit të shqiptarëve që do ta mundte regjimin njësoj si në vitin 1991 patëm të njëjtën shpresë.
Ne u futëm në betejë pak a shumë si në 91-shin pa asnjë pushtet përveç pushtetit moral, por vetëm me kauzën e qytetarëve me dëshirën dhe shpresën e tyre për ndryshim për ballë një makinerie shtetërore të bërë njësh me krimin dhe oligarkinë e cila e derdhi lumë paranë e korrupsionit të drogës, të krimit dhe të fondeve buxhetore në të gjitha format dhe mënyrat.
Ju e dini se për çfarë po flas. E njihni po aq mirë arsenalin e poshtërsive që është derdhur, madje e njihni më mirë se disa që e komentojnë cektësisht dhe mendjelehtësisht nga Tirana masakrën zgjedhore të 25 prillit.
Sepse këtu larg syve përtacë të disave në Tiranë, shteti i bëri njësh me partinë, shteti i bërë njësh me krimin dhe oligarkinë merr forma edhe më të ashpra edhe më të dukshme duke mos i konsideruar si kundërshtarë politikë, si normalitet i pluralizmit, por si armiq, armiq për t’i përjashtuar, armiq për t’i hequr nga puna, armiq për t’i gjobitur, armiq për t’i goditur ju dhe familjet tuaja nga realiteti i dhimbshëm që gjithësecili prej jush e njeh fare mirë”, tha Basha.
Kreu demokrat tha se vendi ka arritur në një stacion kritik për vendin, ku është në rrezik sepse themeli i këtij sistemi janë zgjedhjet dhe mbi to ngrihet gjithçka, ngrihet legjitimiteti i parlamentit, i qeverisë, instuticioneve të tjera.
“Zgjedhje si ato të shtatorin të 2016-ës apo 2017-ës apo masakra zgjedhore e 25 prillit mohojnë të drejtën themelore të qytetarëve të zgjedhë një qeveri, atëherë pushteti s’i takon më njerëzve, s’i takon më popullit, s’i takon më qytetarëve dhe vendi kthehet siç është kthyer këtu në Dibër e anë e mbanë vendit në peng të një pakice, të një pakicë brenda një pakice e cila nuk përfaqëson më interesat e njërzve dhe nuk lufton më për interesat e njërëzve por kthehet në një armike publike të interesave të njerëzve.
Demokratët e Dibrës e dinë fare mirë se ne dolëm në këtë betejë jo me kriminelë, por me njerëz të ndershëm, jo me paratë e korrupsionit dhe të drogës, por me program, me vizion, me zgjidhje.
Si do të përballeshim me këtë reagim? Me te njëjtat mjete? Kush do të fitonte? Do të fitonte Shqipëria nga kjo. A do i duhej Shqipërisë siç e thoshte një mbështetësja jonë, një hajdut më i madh se Edi Rama, një mik më i ngushtë se Tom Doshi, me Qif Rakipin apo me Ymer Lalën.
A do i duhej Shqipërisë zëvendësimi i një pakice plaçkitësish me një pakicë tjetër plaçkitësish. Sigurisht jo. Dhe kjo eshte arsyeja se perse na ndoqën njësoj si në 91”, theksoi Basha.
Ai akuzoi Kryeministrn Rama se po mundohet ta fshehë masakrën zgjedhore duke na shtrirë dorën për bashkëpunim, pa vija të kuqe siç thotë, duke hedhur karremin që hajde të ndryshojmë ligjin zgjedhor, pasi ka bërë masakrën zgjedhore.
“Unë jam këtu për t’ju thënë që rrugë tjetër për Partinë Demokratike, rrugë tjetër për Shqipërinë nuk ka. Bashkë, gjithmonë e më të bashkuar, ta çojnë betejën deri në fund! Këtë betejë ne nuk e nisëm për veten tonë, këtë betejë ne nuk do ta vazhdojmë vetëm për veten tonë. Ne do ta vazhdojmë për të gjithë shqiptarët dhe siç i morëm shqiptarët në kutitë e votimit me 25 prill, ashtu do t’i marrim me vete në këtë betejë sepse fati i Shqipërisë, tashmë varet vetëm nga ne”, tha ai.
