Prej vitesh Policia Bashkiake e cila është në varësi të Bashkisë Tiranë është në një përpjekje të drejtëpërdrejtë me shitësit e fruta perimeve që vijnë nga fshatrat përreth kryeqytetit. Skenat jo të pakta që janë parë, kanë qenë ato të marrjes së produkteve të fshatarëve dhe hedhjes së tyre. Ndërkohë sërish fshatarët të detyruar për të mbajtur familjen dalin në rrugë dhe historia përsëritet.
Ka pasur raste kur këta tregtarë ambulant edhe janë tërhequr zvarrë. Kjo situatë shqetësuese është sjellë sot përmes gazetarit Edvin Parruca, i cili është munduar të marrë një përgjigje nga punonjësit e policisë bashkiake, por më kot.
Ka kërkuar një përgjigje se kur do të marrë fund e gjithë kjo betejë mes bashkisë dhe tregtarëve ambulant që sikundër thotë ai vazhdon prej 30 vitesh.
Ai thotë se ka qenë vetë dëshmitar i skenave të tilla në dhjetëra raste, mirëpo policët shihen se nuk kanë një përgjigje apo zgjidhje afatgjatë të këtij problemi.
“Si jeni, kam një pyetje, në 30 vite shoh këtu përditë e njëjta histori, policia vjen fshatarët vijnë, ju i hiqni ata vijnë, a ka një zgjidhje finale, a mund të vijojë kjo përditë përditë? (heshtje) Nuk ka zgjidhje finale”, shprehet gazetari në video.
Postimi i Parrucës:
Pa të keq e kisha, po është një shpenzim aq i madh energjie, që vazhdon aq gjatë në kohë, që krijon vetëm ndjesi negative, nuk i jap dot kuptim.
P.S. Çdo konotacion negativ që mund t’i japësh terminologjisë së përdorur nga unë, është problemi yt
