Nga Boldnews.al
Nëse kërkohet një Komision Hetimor Parlamentar përtej kufirit të qesharakes, militantesk dhe një lloj uturaku i kryeministrit, padyshim që e kemi. Komisioni hetimor kërkoi që presidenti i republikës të merrej me forcë dhe të sillej aty për të dëshmuar. Deri në këtë pikë arritën ligjvënësit tanë. Baba Taku (Spartak Braho) e bëri propozimin i pari, që nën rreshta u mbështet edhe nga Keti partisë, (Alket Hyseni).
Sot nuk po diskutohet nëse kreu i shtetit duhet shkarkuar apo jo. Nuk po gjykohet as nëse e ka shkelur apo jo Kushtetutën, pasi në këtë vend, gjithkush që ka mundur jo vetëm e ka shkelur atë që quhet si “Libri i shenjtë” i një shteti, por e kanë përdorur gati si një letër për të fshirë duart e ndotura nga yndyra e pushtetit.
Sa ideale për ta do të ishte ta merrnin zvarrë presidentin, duke e shtyrë dhe pështyrë se ka bërë mëkate të mëdha, sepse sulmoi verbalisht kryeministrin. Paradoksi shkon deri në atë pikë se edhe kur Rama pasi i ka shtrydhur në kamikazllëkun politik kur ishin deputetë, i lëshon në rrugë, por vetë këta personazhe janë të kapur deri në inde duke i bërë ndere kreut të qeverisë që kalon në ekstazë kur sheh individë të tillë që edhe pse të gjunjëzuar, sërish e shohin si idhull.
Kushdo nga anëtarët e atij komisioni mund të bëheshin bashkë për të kaluar edhe në çmendurinë juridike për të urdhëruar sjelljen me forcë të kreut të shtetit, por disa u ndalën, jo deri në atë pikë. Megjithatë Spartak Braho dhe Alket Hyseni e hodhën mendimin për ta marrë forcërisht nga presidenca Metën dhe ta detyronin të bënte një autokritikë të thellë, para përfaqësuesve të udhëheqësit Rama.
Spartak Braho mbetet një personazh emblematik i politikës sonë të 30 viteve të fundit ka bërë shumë xhiro nëpër dy partitë e majta, PS dhe LSI. Mbante me vete një çantë të zezë dhe hapej kudo se aty brenda kishte materiale për kundërshtarët, që nëse i bënte publike “binin qeveri”. Po kjo çantë që u përdor si “vallixhja” e presidentit amerikan që mban kodet e bombave bërthamore, por në fakt nuk ishin gjë tjetër përveçse shashka të vogla që i hidheshin jo kundërshtarit, por publikut, duke u tallë fort me këtë të fundit. Dikur ishte “mik për kokë” me Metën, ndërsa sot armik po me kokë… Sepse pushteti të josh, të thith.
Në zgjedhjet e 25 prillit, Braho u rendit i 28-ti në listën Rama. Padyshim që nuk kishte asnjë shans fitoreje dhe as kishte kutin për të thyer herësin, ndonëse u mundua fort. Ai po pret vetëm fundin politik të mbylljes së këtij mandati për të marrë kohën si pensionist, duke u kthyer bashkë me çantën e zezë. Nga ana tjetër, Alket Hyseni, që doli si “bimë” e rritur në oborrik kryeministror të Ramës kishte abicie të mëdha.
Bregdetin e pati nën kontroll dhe jo më kot mori pseudonimin “Pashai i Jugut”. Rama e largoi, e degdisi nga fundi i listës së Vlorës pas përplasjeve për “trafik influencash” me diamantine e partisë, Damian Gjiknurin. Gjatë fushatës tentoi të bëhej factor, por mbeti thjesht një actor pa reputacion, pasi Rama e eklipsoi. Nuk mund të ikte pa një nder të madh për Ramën. U bë kryetar i Komisionit Hetimor Parlamentar për shkarkimin e kreut të shtetit Ilir Meta. Padyshim që Meta do shkarkohet nga ky parlament që do të ketë gjithnjë njollën e zezë të militantizmit dhe paaftësisë por në parlamentin e ardhëshëm Takin dhe Ketin nuk do e shohim më. Megjithatë partia do të gjejë të tjerë personazhe të tillë, vetëm emri u ndryshon!
