Presidenti i Partizanit, Gazment Demi, mori timonin e klubit të kuq në vitin 2013 dhe që nga ajo periudhë, shumë trajnerë kanë pasur drejtimin e skuadrës. Madje, Demi krijoi dhe një “traditë”, pasi çdo sezon të ri, e niste me trajner të ri. Në 2013-’14, në krye të pankinës ishte Hasan Lika e më pas Sampaio.
Në sezonin pasardhës, timoni iu besua Shpëtim Duros. Në edicionin futbollistik 2015-’16, Sulejman Starova ishte trajner i ekipit, ndërsa në ’16-’17, Iuliano e nisi sezonin si trajner. Në sezonin e titullit kampion, 2018-’19, ishte Skënder Gega në krye të pankinës. – shkruan Panoramasport.
Edhe pse fitoi titullin, Gega nuk ishte trajner i Partizanit sezonin pasardhës, me stolin që iu besua Franko Lerdës. Ndërsa në sezonin që lamë pas, Daja u zyrtarizua si trajner i ri i klubit.
Në sezonin e tij të parë në krye të Partizanit, Daja i shkoi shumë pranë titullit kampion, por në ndeshjen e parafundit, Partizani u ndëshkua me një penallti ndaj Vllaznisë, duke humbur me shifrat 0-1. Ndërsa në Kupën e Shqipërisë, u eliminuan nga Laçi me penallti, në një sfidë që kishte shumë polemika sa i takon arbitrimit. Mbetet për t’u parë nëse sezoni 2021-’22 do të ketë trajner të ri në krye të Partizanit apo Ilir Daja do ta prishë këtë “traditë”./Panoramasport
