Kreu demokrat Lulzim Basha ka reaguar përmes rrjeteve sociale ndaj një deklarate të ish-Presidentit Bujar Nishani, sipas të cilit Kryetari i PD ishte në dijeni të vendimit të DASH për të shpallur ish-Kryeministrin Sali Berisha person “non grata”, ndaj dhe ofroi zgjedhjet.
Basha në reagimin e tij e konsideron si një shpifje të ulët të Nishanit, që i shërben përçarjes së PD.
“E kam nisur fushatën për zgjedhjet brenda partisë me bindjen se nga kjo garë duhet të dalim me të fortë dhe më të bashkuar.
Kam refuzuar reagimet që nxisin përçarje edhe pse çdo ditë ndaj meje janë hedhur sulme personale dhe politike të pavërteta dhe të padrejta. Por çdo gjë e ka një limit. Ndaj sot hedh poshtë me neveri shpifjen e ulët të Bujar Nishanit.
Inati e mllefi personal e ka një limit. Por sot ai limit është kaluar, sepse lidhet me një çështje që ka prekur thellë jo një individ, jo Sali Berishën por gjithë partinë tonë. Këto shpifje të ulëta i shërbejnë vetëm atyre që bëjnë gjithçka të përçajnë Partinë Demokratike. Dhe unë këtë nuk do ta lejoj”, shprehet Basha.
Ndërkohë, Sali Berisha në një intervistë televizive tha se kishte respekt për Nishanin, e cilësoi si një nga bashkëpunëtorët më të afërt, por shtoi se nuk e besonte që Basha të kishte pasur ndikim në vendimin e DASH.
