Kryeministri Edi Rama ka zgjedhur të mos komentojë vendimin e Departamentit Amerikan të Shtetit, që shpalli “non grata” në SHBA ish-kryeministrin Sali Berisha dhe familjen e tij.
Në një prononcim për gazetarët lidhur me nisjen e vaksinimit për punonjësit e transportit, Ramës iu kërkua një koment për vendimin e DASH.
Kreu i qeverisë zgjodhi ti mos përgjigjes direkt pyetjes, duke u shprehur se “Jam 100 përqind i fokusuar te punët”.
“Jam i fokusuar 100% te punët. Nuk ka kohë për pushim dhe jam i vendosur të çelim një rrugë të re në aspektin e komunikimit publik dhe të shmangim të gjitha ato aspekte që e kanë kthyer jetën publike në telenovelë rraskapitëse. Për mua ka shumë më tepër rëndësi sa vaksina kryhen gjatë ditës dhe sa kantieret përparojnë duke përmbushur angazhimet tona dhe mbi të gjitha, jemi duke punuar për mandatin e tretë dhe së shpejti do të dalim përpara shqiptarëve me programin e angazhimeve konkrete në kongresin e 12 qershorit”, tha Rama.
Ish-Kryeministri Sali Berisha ka akuzuar publikisht se pas vendimit të DASH qëndron kreu i qeverisë Rama.
Berisha ka mohuar akuzat e DASH dhe ka paralajmëruar padi për shpifje ndaj Sekretarit amerikan të Shtetit Antony Blinken.
