Teuta ka mbyllur dje përgatitjet për ndeshjen e shumëpritur.
Me një seancë të karakterit tekniko-taktik, stafi ka dhënë këshillat e fundit, ndërsa fokusi ka qenë te goditjet standarde, presioni në zonën e kundërshtarit dhe shpejtësia në qarkullimin e topit.
Mungesë e sigurt ndaj Apolonisë është mesfushori Albano Aleksi, i cili ka plotësuar numrin katër të kartonëve të verdhë. Kësisoj, Martini pritet të aktivizojë në vend të tij një mes Erando Karabecit dhe Florent Avdylit, edhe pse më tepër shanse për titullar ka i pari.
Në formacion pritet të rikthehet edhe sulmuesi Blerim Krasniqi, i cili në ndeshjen e javës së 35-të në Laç e nisi nga stoli. Te Teuta janë të karikuar në maksimum për një fitore me goleadë sot.
Mes pezullimeve dhe rikthimeve, trajneri Fabricio Kamarata ka hequr dilemat e fundit për formacionin që do të hedhë në fushë kundër Teutës. Apolonisë do t’i mungojnë tre lojtarë për shkak kartonësh sot në Durrës dhe pikërisht Asllanaj, Levendi dhe Hebeja.
Mirëpo, lajm i mirë është se rikthehen nga pezullimi portieri Harizaj dhe qendërmbrojtësi Agiare. I vetmi dyshim mbetet sulmuesi i krahut, Rimal Haxhiu, i cili, gjithsesi, mund të marrë minuta gjatë ndeshjes, nëse nuk bëhet gati për titullar.
Ndërkohë, së fundmi sulmuesi Mario Gjata është grumbulluar nga trajneri i Shpresave, Alban Bushi, për të qenë pjesë e kuqezinjve U-21 në startin e kualifikueseve kundër Andorrës. 20-vjeçari është golashënuesi më i mirë i ekipit këtë sezon.
/Panorama Sport/
