Ministri gjerman: Gjysma e infektimeve me Covid nga Ballkani. Rama: Deklarata, një skandal!

Ministri gjerman i Shëndetësisë, Jens Spahn ka deklaruar se, referuar gjurmimit nga autoritetet vendase, gjysma e të gjitha rasteve me koronavirus në Gjermani verën e kaluar erdhën pas vizitave familjare nga emigrantët në Ballkan.

Ndërkohë, kryeministri Edi Rama ka kritikuar ministrin gjerman pas kësaj deklarate.

“Është një skandal që një ministër gjerman denoncon publikisht Ballkanin dhe kështu gjithashtu zhvlerëson njerëzit me një sfond emigrimi. Unë nuk do të lejoj që Shqipëria të portretizohet si një zonë rreziku për udhëtimet e pushimeve, nuk ka shifra për ta provuar këtë”, citohet të ketë thënë kryeministri Rama për gjermanen “Bild”.

“Një ministër gjerman i shëndetësisë duhet të kujdeset për vaksinimin e popullsisë gjermane dhe të mos zgjojë pakënaqësi stereotipe kundër Ballkanit në mënyrë që të mbrojë një rekord të dukshëm të keq”, citohet më tej Rama nga “Bild”.

Më herët, në një prononcim po për “Bild”, ministri gjerman Spahn u shpreh: “Ne mësuam nga vera e kaluar. Në atë kohë, udhëtimet jashtë vendit, shpesh vizitat te të afërmit në Turqi dhe Ballkan, shkaktuan rreth 50 përqind të infeksioneve tona të reja. Ne duhet ta parandalojmë këtë këtë vit”.

Sipas Spahn, vizitat tek të afërmit nuk duhet të ndalohen këtë verë. Por, ai shtoi se po tentohet të përfundohet një marrëveshje me Turqinë për testime për hyrjet dhe daljet mes dy vendeve.

“Në këtë fazë të fundit të pandemisë, për udhëtarët e huaj vlen këshilla: testiohuni dhe jini vigjilent. Çdo gjë tjetër rrezikon suksesin tonë”, citohet Spahn nga “Bild”.