Nga BoldNews.al
Gjykata Kushtetuese, i ka dhënë të drejtë Presidentit të Republikës, i cili vendosi të mos dekretonte Gent Cakaj për ministër të Jashtëm.
Me një vendim unanim 7 me zero të të gjithë anëtarëve, Gjykata Kushtetuese konstatoi se emërimi i një ministri kalon nëpërmjet një procedure që i sheh si të barabartë kryeministrin, parlamentin dhe Presidentin.
Rreth dy vjet më parë, Kryeministri Edi Rama paditi në Gjykatën Kushtetuese Presidentin Ilir Meta, pasi ky i fundit refuzoi të dekretonte Gent Cakaj në postin e Ministrit të Jashtëm.
Në atë kohë, Meta dha sqarime të detajuara për vendimin e tij lidhur me mospranimin e emrit të Cakajt për postin e Ministrit të Jashtëm.
Kryeministri Rama nuk u pajtua me këtë vendim dhe kërkoi nga Kushtetuesja zgjidhjen e mosmarrëveshjes së kompetencës mes postit të tij dhe kreut të Shtetit lidhur me emërimin e ministrave, si edhe kërkoi interpretimin e nenit 98 të Kushtetutës, që lidhet pikërisht me këtë moment politik.
Sipas Ramës, emërimi i ministrave është kompetencë ekskluzive e Kryeministrit dhe presidenti ka vetëm rol honorifik, nëpërmjet dekretimit të vullnetit të shefit të qeverisë.
Por, Gjykata Kushtetuese e konsideroi shumë më ndryshe situatën e përplasjes ndërmjet institucioneve.
Në një njoftim të shpërndarë pasditen e kësaj të Martë, Gjykata Kushtetuese deklaron se ka pranuar pjesërisht kërkesën e Kryeministrit, lidhur vetëm me interpretimin e nenit 98 të Kushtetutës së Republikës së Shqipërisë.
Ndërkohë, Gjykata Kushtetuese ka rrëzuar kërkesën e Ramës për konstatimin e konfliktit të kompetencave mes Kryeministrit dhe Presidentit, lidhur me emërimin e ministrave.
Sipas interpretimit të Gjykatës Kushtetuese, “në procedurën e emërimit dhe shkarkimit të ministrit, Kryeministri, Presidenti dhe Kuvendi, udhëhiqen nga parimi i luajalitetit kushtetues dhe atij të ndarjes dhe balancimit të pushteteve”.
Për trupën gjykuese, “kompetenca për emërimin dhe shkarkimin e ministrit ndahet ndërmjet tre organeve të mësipërme”.
Anëtarët e Kushtetueses theksojnë se “Procesi i emërimit të ministrit duhet të garantojë përmbushjen e kritereve dhe cilësive kushtetuese për këtë funksion”.
Sipas vendimit të Gjykatës Kushtetuese, i cili pritet të zbardhet në ditët në vijim, “vlerësimi dhe verifikimi i kandidatit për ministër, bëhet nga të tre organet e përfshira në proces, secili sipas rolit dhe kompetencave të tij kushtetuese, brenda afateve kushtetuese, në përputhje me arsyetimin e këtij vendimi”.
Në 10 janar 2019, Presidenti Ilir Meta refuzoi dekretimin e Gent Cakaj në postin e ministrit të jashtëm, pasi kryeministri Rama shkarkoi nga detyra kryediplomatin Ditmir Bushati.
Sipas Metës, “profili i z. Genti Cakaj, i propozuar për postin e ministrit për Evropën dhe Punët e Jashtme, ka mungesë të qartë të përvojës politike, diplomatike, administrative, shtetërore, në secilin element dhe në tërësi”.
Pas këtij vendimi të Metës, kryeministri Rama reagoi ashpër, duke shprehur mosaprovimin e tij për situatën, si edhe e dërgoi çështjen në Gjykatën Kushtetuese.
Cakaj qëndroi si i komanduar në detyrën e Ministrit të Jashtëm, post që formalisht e mbajti vetë Edi Rama.
Në fund të Dhjetorit 2020, Gent Cakaj dha dorëheqjen nga detyra dhe në vend të tij u emërua Olta Xhaçka, e cila më herët mbante postin e Ministres së Mbrojtjes.
