Anëtari i Kryesisë, njëkohësisht edhe kandidati për kryetar të partisë Demokratike, Fatbardh Kadilli, u shpreh sot se nuk do të largonte ish-Kryeministrin Sali Berisha, të cilin e konsideroi një institucion, dhe jo një deputet të thjeshtë të PD apo anëtar të saj.
Ndërsa u pyet nëse do të përjashtonte nga PD, ish kryeministrin Sali Berisha nëse do të fitonte zgjedhjet, Kadilli tha se PD duhet të ishte një parti e bashkuar dhe jo përjashtuese. Ai e konsideroi Berishën si një institucion dhe jo si një person të thjeshtë duke thënë se marrëdhënia e tij me PD varej nga vetë qëndrimi që do të mbante ish kryeministri.
“Padyshim më i miri jam unë, sepse kam një nismë të qartë. Kam shpalosur tëë gjitha parimet e mia me të cilat unë jam krijuar, me vlerat e konservatorizmit.
Pata një përpjekje në mbledhjet e fundit të kryesisë që t’i detyroja që të bëhej një garë e ndershme dhe e hapur mes kandidatëve. Nu k do ndalem dhe do jem deri në fund fitues, ky është projekti fitues.
Unë flas për një PD të bashkuar jo për një parti që përjashton. Berisha është një institucion nuk flasim për një person të thjeshtë. Ai e ka vetë në dorë të përcaktojë marrëdhënien me partinë e tij, kjo varet nga qëndrimi që do të mbajë ai në vazhdim”– tha Kadilli.