Një dokument i hartuar nga shërbimi sekret grek rendit emrat e 500 kriminelëve që terrorizojnë Greqinë me vrasje, grabitje, dhunë, kontrabandë dhe pastrim parash.
Referuar dokumentit të publikuar nga Kathimerini, veprimtaria e grupeve kriminale është e përqëndruar në Patra, Agrinio, Zakynthos, Kalamata, Mykono dhe shumë qytete e ishuj të tjerë.
Bazuar te informacionet që kanë dalë nga dokumenti i shërbimit sekret, gazeta “Kathimerini” shkruan se struktura e organizatave kriminale është hierarkike dhe është e ngjashme me mafien siciliane. Grupet janë me shumë anëtarë, ata kanë një udhëheqës, zëvendës dhe anëtarë me role specifike.
“Në të gjitha grupet udhëheqësit janë grekë, ndërsa anëtarët përfshijnë gjithashtu shqiptarë, rumunë si dhe nga vendet e ish-Bashkimit Sovjetik” thuhet në artikull.
Në raport renditen emrat e 500 kriminelëve, të cilët megjithë arrestimet e herëpashershme dhe dënimet me burg, vazhdojnë të veprojnë pa pengesa.
“Disa prej tyre janë vrarë për larje hesapesh” vijon më tej shkrimi.
Po sipas shkrimit të gazetës greke grupet kriminale i pastrojnë paratë në blerjen dhe investimin te karburantet, furrat e bukës, dyqanet e pijeve alkoolike, krijimin e ndërmarrjeve të ndërtimit, blerjen e hoteleve, ekipeve të futbollit dhe madje edhe investime në parqe fotovoltaike.
