Endri Elezi, 29-vjeçari shqiptar i akuzuar se furnizoi me armë autorin e masakrës në Nisë, është ekstraduar në Francë.
Javë më parë ai u arrestua në Itali, dhe akuzohet se i dha një armë kallashnikov personit që vrau 86 njerëz në Nisë, në vitin 2016, dhe plagosi qindra të tjerë.
Vendimin për ekstradimin e shqiptarit e mori një gjykatë në Napoli të Italisë.
Endri Elezi, i cili ishte subjekt i një urdhri evropian të lëshuar nga Franca në 27 Prill 2020, u arrestua në Sparanise, afër Caserta, në Italinë e Jugut, raporton Noa.al duke cituar medien franceze ouest-france.fr.
Gjatë seancës dëgjimore para gjykatës italiane, ai kishte mohuar akuzat kundër tij, duke thënë se “unë kurrë nuk kam shitur ose furnizuar me armë dhe nuk njoh asnjë nga personat e përfshirë në atë ngjarje”.
Më 14 korrik 2016, Mohamed Lahouaiej Bouhlel u përplas me një kamion mbi turmën e mbledhur pranë detit në Shëtitoren e Anglais në Nisë, me rastin e Ditës Kombëtare, duke vrarë 86 njerëz.
Endri Elezi, me nofkën Gino, dyshohet se i dha sulmuesit një armë kallashnikov.
Endri Elezi akuzohet për komplot dhe shkelje të legjislacionit të armëve, si pjesë e hetimit të trafikut të armëve.
