Studentët e Fakultetit të Ekonomisë, Universiteti i Tiranës, të enjten, i kanë kërkuar ministres së Arsimit, zonjës Evis Kushi të përgjysmojë tarifat e këtij viti akademike, me arsyen se orët e mësimit janë zhvilluar online.
Në letrën e dërguar për ministren ata shprehen se gjatë gjithë vitit nuk kanë qenë prezent në auditorë dhe janë detyruar të paguajnë për të siguruar aksesin në internet.
“Nisur nga kushtet në të cilat shkoi ky vit mësimor, ne e shohim të udhës që tarifat e studimit të të dyja cikleve të studimit Bachelor dhe Master të përgjysmohen pa dallim për të gjithë studentët”, citohet nga letra.
Letra e plotë:
“Drejtuar: Znj, Evis Kushi, Ministre e Arsimit, Rinisë dhe Sporteve
Duke marrë shkas nga një njoftim i bërë publik në faqen e Fakultetit të Ekonomisë, Universiteti i Tiranës, në lidhje me mandat-pagesat e tarifave të studimit, konstatojmë se ky është një njoftim i nxituar dhe i pakonsultuar për mundësinë e rishikimit të tarifave të studimit.
Nisur nga kushtet në të cilat shkoi ky vit mësimor, ne e shohim të udhës që tarifat e studimit të të dyja cikleve të studimit Bachelor dhe Master të përgjysmohen pa dallim për të gjithë studentët.
Këtë kërkesë ne e bazojmë dhe argumentojmë duke sjellë në vëmendje cilësinë e shërbimit të mësimdhënies online.
Për ne është e papranueshme që të paguajmë tarifa të plota studimi, për një vit akademik kur:
1- Shumë familje u prekën ekonomikisht nga pandemi, duke humbur edhe punën e tyre. Në mungesë të të ardhurave, bëhet e pamundur pagesa e plotë e tarifës së studimeve.
2-Gjithë vitin akademik nuk kemi qenë në auditore dhe jemi detyruar të paguajmë paketa interenti për të patur akses në mësimin online, dhe përsëri ka qenë e pjesshme.
3- Krahasimisht me procesin mësimor në auditore, mësimi online ka qenë diskriminues dhe i paplotë.
Bazuar në argumentet e parashtruara më sipër ne kërkojmë që Ministria e Arsimit, Sportit dhe Rinisë në bashkëpunim me instancat e tjera të Arsimit të Lartë përgjegjëse për administrimin e buxhetit të bëjnë të mundur përgjysmimin e tarifave të studimit për të dyja ciklet Bachelor dhe Master për këtë vit akademik.
Në pritje të përgjigjes tuaj.”
