Universiteti i Tiranës, ka vendosur që provimet e semestrit të dytë do të zhvillohen online me të njëjtën procedurë që u realizuan edhe provimet e semestrit të parë të vitit akademik 2020-2021.
Studentët kanë kërkuar që ky vit akademik të mbyllet online, pavarësisht masave lehtësuese të Komitetit Teknik që lejoi kthimin në auditore për sezonin e provimeve.
Rektori i Universitetit të Tiranës, Artan Hoxha, tha sot për mediet se “parimisht provimet në tërësinë e tyre do të zhvillohen online si në semestrin e parë, kurse ato programe që kanë specifikë do të kenë mundësi t’i zhvillojnë provimet në auditor”.
Sipas tij, mbyllja e semestrit do të jetë me disa konsultime që pedagogët dhe studentët do bien dakord për komunikim në auditor, por jo leksione në auditor.
Sezoni i provimeve në Universitetin e Tiranës nis pas datës 20 maj. Ky vit shkollor u zhvillua online për të gjithë studentët në vend për shkak të pandemisë COVID-19. Në Universitetin e Tiranës mbi 90% e provimeve të semestrit të parë u zhvilluan në distancë gjë që rezultoi me sukses me gjithë problematikat.
