Një rast i rëndë ka ndodhur në fshatin Tarazh të Mirditës pak ditë më parë, ku një vajzë e mitur 15-vjeçare është përdhunuar në grup nga 5 persona.
15-vjeçarja dyshohet se ka pasur lidhje me njërin nga këta 5 personat. Ai i ka bërë video dhe më pas e ka shantazhuar dhe e ka detyruar që të kryejë marrëdhënie me persona të tjerë që prej muajit janar.
Lidhur me këtë fenomen të tmerrshëm ka reaguar ish-konkurrenti i “Për’puthen”, Elvisi, i njohur ndryshe si Loco. Në një postim të bërë në “Instastory”, ai shprehet se i vjen turp që jeton në një shoqëri si kjo. I vjen turp që njerëzit gjykojnë Anën që nxjerr këngë për qejfin e vet, e nuk merret me përdhunuesit e një minoreneje.
“M’vjen turp. M’vjen turp që jetoj mes një shoqërie si kjo, pa njerzillëk. M’vjen turp që jetoj mes një shoqërie që gjykon më shumë Anën se nxori këngë për kokërr të qejfit vet, se sa përdhunuesit e një minoreneje.
M’vjen turp, që jam rrit e po jetoj në një shoqëri ku vritemi për një koment në Instagram, e nuk ju dalim në mbrojtje motrave e nënave të njëri-tjetrit.
Mor m’vjen turp ti them një të huaj që jam shqiptar. Ca ti them unë atij? Jemi populli më i lashtë në Ballkan dhe kemi gjuhë të veçantë? Po pastaj? Popull që përdhunojmë minorenet dhe ju bëjmë shantazhe mos të tregojnë?
Mor edukojini ata djem. Që femra nuk është vegël. Nuk është prona e askujt, o ju qr mu në mentalitet. Edukoni dhe vajzat, që s’kanë pse të heshtin kur cenohen, o ju qr mu në nder, që doni të ruani duke ndrydhur vajzat e juaja”, shkruan Loco në postimin e tij të gjatë.
Më pas ish-konkurrenti i “Për’puthen” shkruan se nëse organizohet ndonjë protestë në lidhje me këtë ngjarje, t’i tregojnë, pasi do të dalë që të protestojë për sigurinë e të afërmve të secilit prej jush.
“Nëse do organizohet ndonjë protestë, ose çfarëdolloj aktiviteti në lidhje me këtë rast, ju lutem më informoni sapo të merrni vesh, se ndoshta nuk e marr vesh në kohë.
Në pamundësi për ti kërkuar çdo kujt për të protestuar për sigurinë e të afërmve të mia, më thoni, se dal unë të protestoj për sigurinë e të afërmve të secilit prej jush”, shkruan më pas Loco.
