Ish-Kryeministri Sali Berisha do të japë sot një konferencë të jashtëzakonshme për mediat, një ditë pas vendimit të DASH, ku ai dhe familjarë të afërm të tij u përfshinë në atë që konsiderohet si lista e zezë.
Mësohet se Berisha do të japë konferencën në një prej sallave (Antigonea) në hotel Rogner, në orën 18:00.
Pritet që ish-Kryeministri Berisha të paraqesë argumentet e tij lidhur me vendimin e bërë publik nga Sekretari amerikan i htetit, Antony Blinken.
Në një postim në FB, Berisha shprehet se gjatë 30 viteve në politikë nuk ka ekzistuar kurrë asnjë akuzë në adresë të tij, nga asnjë person, asnjë institucion vendas apo i huaj për abuzim të fondeve publike dhe çfarëdo lloj tjetër korrupsioni.
Ai shton se gjatë të gjitha viteve në pushtet, por dhe deri më sot, familjaret e tij nuk kanë përfituar kurrë nga fonde dhe asete publike dhe kanë zbatuar me rigorozitet të plote ligjet e vendit. Sipas ish-kryeministrit, ata, deri me sot, nuk kanë qenë kurrë nën akuzë nga drejtësia shqiptare apo e ndonjë vendi tjetër.
“Duke shprehur keqardhje për vendimin dhe duke e konsideruar atë pa asnjë bazë konkrete, ju ftoj të bëni publike çdo fakt e dokument që administrata e juaj, apo kushdo në bote, mund të disponoje për të argumentuar pretendimin tuaj për mua dhe familjaret e mi”, shkruan ish-kryeministri.
Ai shton se një ndër faktorët më kryesorë që qeveria që kam drejtuar arriti të anëtarësoje Shqipërinë në NATO, të firmosë Marrëveshjen e Stabilizimit Asociimit dhe liberalizojë vizat me Bashkimin Europian, të arrijë nivelin e pragut të MCAC, dhe të tërheqë investime madhore, por edhe të shënoje kulme në marrëdhëniet midis “dy vendeve tona mike”, ka qenë lufta e suksesshme kundër korrupsionit dhe krimit të organizuar e dokumentuar kjo dhe në raporte dhe vlerësime të qeverisë së SHBA.
