Lëvizja Vetëvendosje deklaron se KAS votoi sot në mbështetje të krimit elektoral, duke iu referuar rrëzimit të ankimit të kandidatit të pavarur të mbështetur nga kjo forcë politike në Gjirokastër.
“Me 3 vota Kundër dhe 2 vota Pro, Komisioni për Ankesa dhe Sanksione (KAS) e rrëzoi sot ankesën e kandidatit të pavarur Kreshnik Merxhani për shpalljen e pavlefshmërisë së zgjedhjeve në Qarkun e Gjirokastrës. Pa u shprehur mbi asnjë prej provave të depozituata nga Merxhani, pa folur fare për videot e bëra publike që dëshmonin përtej çdo dyshimi manipulimin e votave gjatë procesit të numërimit, pa pranuar kërkesën për verifikime të thelluara, me arrogancën e numrave dhe në shkelje të Kodit Zgjedhor, tre anëtarët e KAS-it e rrëzuan sot ankesën e Merxhanit”, thuhet në një reagim të Vetëvendosjes.
“Ky vendim tenton të vendosë vulën e heshtjes dhe mosveprimit mbi vjedhjen dhe deformimin e votës. Anëtarët e KAS-it janë të përzgjedhur nga partitë politike. Tre prej tyre, ata që votuan kundër ankesës, janë të përzgjedhur nga Partia Socialiste. Me një përbërje të tillë, KAS-i ndjek linjën e instucioneve të kapura që punojnë kundër drejtësisë dhe demokracisë”, shton Vetëvendosja.
Ne do të vazhdojmë ta ndjekim këtë ankesë duke e depozituar kërkesën tonë brenda 5 ditëve pranë Kolegjit Zgjedhor, mbyllet reagimi.
