Shërbimi për Çështjet e Brendshme dhe Ankesat, ka reaguar sot zyrtarisht lidhur me ngjarjen e ndodhur një ditë më parë, kur Policia e Fierit ka plagosur me armë zjarri një 29-vjeçar nga Patosi, pasi ai ka tentuar t’i qëllojë me kallashnikov.
Ngjarja ka ndodhur në fshatin Gjorgoz të Njësisë Administrative Cakran, të Bashkisë Fier, ku Greseld Shpataraku ishte duke ruajtur një parcelë të mbjellë me kanabis.
Gjithashtu në lidhje me këtë ngjarje është shpallur në kërkim bashkautori tjetër, A.R., 23 vjeç., i cili ka mundur të largohej nga vendi i ngjarjes, shtetasi A.R., 23 vjeç, banues në Patos.
Sakaq në vendngjarje u gjetën dhe u sekuestruan 1 automatik me dy krehra të lidhur me natriban, të mbushur me nga 30 fishekë secili. Sipas policisë automatiku në vendngjarje u gjet në gjendje të gatshme për të realizuar qitjen, ndërsa në çadrën e vendstrehimit, u gjetën rreth 180 fishekë me pako.
Çadër strehimi ishte e tipit alpin për fjetje në të cilën kishte edhe ushqime.
Në vendin e ngjarjes u gjetën rreth 270 gota të mbjella me fidanë të bimës Kanabis Sativa, dhe dy parcela me 23 bimë të mbjella në tokë dhe 1 telefon celular.
Informacion i plotë:
SHÇBA në bashkëpunim me Prokurorinë e Rrethit Gjyqësor Fier, si edhe struktura të DVP Fier referuan materialet pranë Prokurorisë Fier për arsye se në vendin e quajtur pylli i fshatit Gjorgoz, në Njësinë Administrative Cakran, Grupi i Monitorimit dhe Kontrollit të Territorit gjatë ushtrimit të detyrës bazuar mbi planet për evidentimin e kultivimit të bimëve narkotike, ka kapur në flagrancë një person të panjohur, të armatosur.
Grupi i Kontrollit të policisë mbështetur në Planin e Veprimit të DVP Fier dhe në Urdhërin “Për ngritjen e Grupit të Kontrollit të territorit për kultivim të bimëve narkotike”, në bashkëpunim me Rojtarin e Pyllit, përfaqësues i Institucionit të pushtetit vendor, janë ndeshur me një person i cili ka drejtuar armën automatike.
Në këtë moment, pasi punonjësit e policisë kanë parë veprimin e tij, i kanë bërë disa herë thirrje të ndalonte, por personi ka shfaqur rezistencë duke mbushur armën për të qëlluar në drejtim të tyre.
Në kushtet e një situate të tillë, punonjësi i policisë ka qëlluar në drejtim të personit të armatosur duke e plagosur atë në shpatull.
Në lidhje me ngjarjen e mësipërme u arrestua në flagrancë shtetasi G. Sh., 29 vjeç, për veprat penale “Kultivimi i bimëve narkotike”, “Mbajta pa leje e armëve dhe municionit uftarak” dhe “Mosbindjes ndaj urdhrit të punonjësit të policisë së rendit publik”.
Gjithashtu, në lidhje me këtë ngjarje u shpall në kërkim bashkautori tjetër, i cili ka mundur të largohej nga vendi i ngjarjes, shtetasi A.R., 23 vjeç, banues në Patos.
Në vendngjarje u kryen të gjitha veprimet procedurale, si dhe u gjetën dhe u sekuestruan në cilësinë e provave materiale:
1 automatik me dy krehëra të lidhur me natriban, të mbushur me nga 30 fishekë secili. Automatiku në vendngjarje u gjet në gjendje të gatshme për të realizuar qitjen;
rreth 180 fishekë me pako të cilat u gjetën në çadrën e vendstrehimit;
çadër strehimi i tipit alpin me tesha për fjetje dhe ushqime.
rreth 270 gota të mbjella me fidanë të bimës Kanabis Sativa, dhe dy parcela me 23 bimë të mbjella në tokë;
1 telefon celular.
Nga hetimet paraprake të kryera në vendngjarje dhe nga deklaratat e dëshmitarëve u arrit në përfundimin se veprimet e punonjësit të policisë klasifikohen si të rregullta juridikisht dhe në përputhje me procedurat standarde të përdorimit të armës, duke qenë tërësisht në kushtet e mbrojtjes së nevojshme.
Hetimet vazhdojnë deri në zbardhjen e plotë të ngjarjes.
SHÇBA mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të shkeljes së ligjit, duke telefonuar në numrin e gjelbër 0800 90 90.
