Malaj: Një marrëveshje Rama-Basha nuk është zgjidhje për vendin. Kriptomonedhat? Bitcoin bixhoz financiar

Presidenti i Institutit për Politika Publike dhe Mirëqeverisje, Arben Malaj, i ftuar në rubrikën “Opinion” në “News 24” deklaroi se marrëveshja e mundshme politike Rama – Basha nuk ofron zgjidhje për vendin, pasi dakordësia më shumë do ishte në nivel personal. Malaj shtoi se palët duhet të arrijnë dakordësi për sistemin zgjedhor.

“Ekonomia ndikohet nga zgjedhjet. Qeveria ka test me të ardhmen europiane të Shqipërisë. Këta ishin zgjedhje pa zgjidhje. Ndërkombëtaret kanë thënë se negociatat nuk do të çelen. Ka zhvillim të urojmë pozitiv nga Rama, që tha se do zgjasë dorën, duke thënë se do të ndahet nga politika e baltosjes. Të urojmë që është një angazhim serioz. Rama në tetë vjet nuk ndërtoi dot kulturë të re politike. Palët të ulen për disa çështje me rëndësi. Të zgjedhim modele europiane të ndarjes së zonave elektorale. S’kemi bërë kurrë zgjedhje të parakohshme kurrë, vetëm kur u dogj Shqipëria. Palët të ulen në taviolinë, duke lënë mënjanë egot personale. Besoj se Rama nuk e ka pasur të lehtë që të shtrijë dorën për bashkëpunim. Keqqeverisja po sjell braktisjen e vendit”, tha Malaj.

Arben Malaj nënvizon se biznesi i kriptomonedhave nuk ka të ardhura, duke shtuar se Bitcoin është bixhoz financiar. Profesori iu bën thirrje biznesmenëve që të mos bien pre e mashtrimit dhe të mos investojnë në monedha elektronike.

“Biznesi i kriptomonedhave nuk ka për të ardhura. Bitcoin është bixhoz financiar, mos bini pre e mashtrimit

Një vend zhvillohet kur individët nuk dështojnë në projektet e tyre. Është në brendësi të qenies njerëzore që të pasurohet sa më shpejt, por ndonjëherë kthehet në babëzi. Skemat piramidale në Shqipëri ishte një tmerr e kolaps ekonomik. Kriptomonedhat shkuan nga pak dollarë në shumë dollarë, tregon se ka dyshime. Bitcoin është bixhoz. Do i lutesha çdo investitori shqiptar, nuk është e lehtë të pasurohesh shpejt. Mos bini viktimë e kriptomonedhave. Banka e Shqipërisë, institucionet financiare duhet të bashkëpunojnë me median, të edukojnë që nga fëmija tek investitori i madh, që mos bien pre e dështimit. Në Amerikë krijohen shumë skema piramidale dhe ndaj autoritetet duhet të edukojnë individët”, u shpreh Malaj.