Partizani ka dalë triumfuese në superfidën e javës së 34-t kundër Teutës me rezultatin 0-1. Në sfidën e luajtur në “Niko Dovana” në Durrës, të kuqtë e Ilir Dajës e nisën keq ndeshjen teksa vendasit dominuan.
Gjithsesi me kalimin e lojës, “Demat” filluan të vinin në zbatim taktikat e Dajës duke fituar terren në lojë. Pas disa rasteve të mira, Partizani kaloi në avantazh në minutën e 25-të. Autori i golit për “Demat” është Eraldo Çinari.
Pas një mosmarrëveshje mes Arapit dhe Frashërit. Çinari shënon me kokë. Në festë të kuqtë të cilët marrin avantazhin në këtë sfidë deçizive për titullin kampion.
Gjatë 45 minutave të dyta, Teuta u hodh e gjitha në sulm në kërkim të golit të barazimit por rastet më të pastra për shënim i kishte Partizani. Fillimisht në minutën e 51-të shtylla i mohon golin e dytë të kuqve. Ishte mesfushori Murataj që provoi, me një predhë nga distanca, por topi u ndal te pjesa ku bashkohen 2 shtyllat.
Tjetër rast i shkëlqyer ishte i minutës së 63-të. me Bardhin, por portieri Frashëri mban në lojë Teutën, duke ndalur futbollistin e kuq, i cili ishte i vetëm përballë gardianit korçar.
Vendasit u përpoqën të kundërpërgjigjeshin me Arapin disa minuta më vonë por pa rezultat. Arapi provon me kokë brenda zonës, pas harkimit të Plakut, por tentativa e tij shkon jashtë kuadratit.
Përfundimisht 0-1, me Partizanin që merr kryesimin e Superiores 2 javë nga përfundimi i kampionatit.
