Tenderat/ 1.3 mln euro pa garë familjarëve të Luan Bregasit e Sadri Abazit

Një tender me vlerë 130 milionë lekë të reja pa TVSH (rreth 1.3 milionë euro), i zhvilluar nga Operatori i Sistemit të Shpërndarjes së Durrësit, është fituar pa garë dhe me rreth 99.9 përqind të fondit limit nga një bashkim operatorësh, i përbërë nga “EN-BI Power” shpk dhe “Alko Impeks General Construksion”.

Kompanitë, të cilat ishin pjesëmarrëset e vetme në këtë procedurë konkurimi, janë në pronësi të familjarëve të Luan Bregasit, një biznesmen i lidhur ngushtësisht me Partinë Socialiste, si edhe të Sadri Abazit, deputetit aktual të maxhorancës qeverisëse të Edi Ramës.

Tenderi kishte si objekt “Zgjatim i fiderit 12 me kabina dhe rrjet të ri Tensionit Ulët, nënstacioni 110/20 kV Sallmone, Loti I”.

Procedura është hapur në mesin e Shkurtit 2021 dhe kishte fond limit vlerën prej 131,260,000 lekë të reja pa TVSH.

Në përfundim të procedurës, siç njofton drejtori i Operatorit të Sistemit të Shpërndarjes në Durrës, Plator Mehmeti, rezulton se ka marrë pjesë vetëm një konkurent, i përbërë nga dy kompani.

“En-BI” shpk dhe “Alko Impeks General”, të cilat u shpallën edhe fitues, kanë paraqitur ofertën në vlerë prej 131,022,407 leke pa tvsh, ose vetëm 250 mijë lekë më pak se sa fondi limit.

Fituesit

Kompanitë fituese të tenderit pa garë me vlerë rreth 1.3 milionë euro janë të lidhura me zyrtarë të Partinë Socialiste.

“En-Bi Power” shpk është regjistruar në vitin 2014 dhe është në pronësi të Tajar Bregasit, vëllait të ish-drejtuesit të Dhomës Kombëtare të Tregtisë, Luan Bregasi.

Krahas biznesit, Luan Bregasi u përfshi edhe në jetën politike. Ai ka qenë përfaqësues i Partisë Socialiste në Këshillin Bashkiak të Tiranës dhe një prej njerëzve që është shfaqur hapur dhe publikisht në mbështetje të kryeministrit Edi Rama dhe kryebashkiakut të kryeqytetit, Erion Veliaj.

Ndërsa “Alko Impeks General Konstruksion” është pjesë e rrjetit të kompanive të krijuara nga Sadri Abazi, një prej deputetëve aktualë të Partisë Socialiste dhe që nuk arriti të siguronte një ulëse në Parlamentin që nis punimet në Shtator të vitit 2021.

Kompania “Alko Impeks” administrohet nga nipi i Sadri Abazit, Arbër Abazi, i cili u caktua si menaxher i interesave të deputetit të Partisë Socialiste, menjëherë pasi ky mori mandatin e deputetit në krah të kryeministrit Edi Rama.

Sa për kronikë, duhet theksuar se tenderi me vlerë 1.3 milionë euro i Operatorit të Sistemit të Shpërndarjes në Durrës ka qenë me procedurë të hapur.

Por, mesa duket, asnjë operator ekonomik nuk ka preferuar të përballet me fuqinë e dy kompanive, të lidhura me Luan Bregasin dhe Sadri Abazin.