Autoriteti Rrugor Shqiptar njofton se ditën e nesërme- E Diel – nga ora 21:00 deri në orën 06:00, do të fillojë larja e mureve të Tunelit të Krrabës.
Në njoftimin e publikuar në faqen zyrtare në “FB”, ARRSH sqaron se gjatë këtij orari do të punohet për larje në njërin tub, duke lënë të lirë për qarkullim tubin tjetër dhe se ky proces do të përfundojë brenda një periudhe 30-ditore.
ARRSH thotë se në bashkëpunim me Drejtorinë e Policisë Rrugore, është hartuar Plani i Menaxhimit të Trafikut, i cili parshikon që gjatë natës, kur në njërin tub të punohet për larjen, të qarkullohet në tubin tjetër, me të dyja senset e lëvizjes, me shpejtësi të reduktuar dhe në prezencën e patrullave të Policisë Rrugore nga të dy anët e tunelit (Tiranës dhe Elbasanit).
Nga ana e Operatorit të Tunelit, janë marrë masat për zbatimin e Planit të miratuar të Menaxhimit të Trafikut, thuhet më tej në njoftim.
ARRSH udhëzon të gjithë drejtuesit e mjeteve që do të qarkullojnë në Tunelin e Krrabës gjatë orëve të natës, të zbatojnë sinjalistikën rrugore dhe mesazhet në tabelat elektronike të tunelit.
