Mbrojtësi i Partizanit, Eneo Bitri, ishte një ndër më të mirët në fushën e lojës në derbi.
Pas barazimit me Tiranën, 24-vjeçari foli për “Panorama Sport”, duke thënë se Partizani meritonte diçka më shumë, si dhe shpreh bindjen se në tri sfidat e mbetura, të kuqtë do të marrin 9 pikët e plota.
Barazimi në Derbi- Duke parë rastet që kishim, mund të kishim marrë më shumë. Tirana nuk ka gjuajtur asnjëherë në portë. Por, futbolli ky është, një barazim 0-0, por që na mban ende në garën për titullin.
Gjatë gjithë lojës, kemi bërë një lojë me tempo të lartë. Nuk është e lehtë të luash çdo tri ditë, ngarkesa kemi pasur. Ka qenë një lodhje e madhe.
Ndeshja ndaj Teutës një sfidë “jetë a vdekje”? Ndeshja në Durrës nuk mendoj se është “jetë a vdekje”, por është një ndeshje për t’u vlerësuar, pasi Teuta ka një ekip shumë të mirë. Edhe ata do të mobilizohen, pasi luhet titulli kampion.
Martini dhe Arapi ishin në tribunë. Mendoni se i druhen Partizanit dhe ishin prezentë për të bërë “detyrat” e shtëpisë?
Mendoj se jo vetëm ata, por të gjithë i druhen Partizanit. Mendoj se kanë ardhur për të studiuar kundërshtarin e radhës, që jemi ne. Kam bindjen se Partizani do t’i marrë 9 pikët e plota në tri ndeshjet e mbetura.
