Grupimi “Për PD”, ku përfshihen anëtarë të Këshillit Kombëtar, mes të cilëve edhe ish-Presidenti Bujar Nishani, ka kundërshtuar thirrjen e mbledhjes së Kryesisë dhe Këshillit Kombëtar, të cilat priten të zhvillohen më 16 maj, me argumentin se agjenda e mbledhjeve nuk mund të përcaktohen në mënyrë të njëanshme.
Përmes një deklarate, ky grupim thekson se institucionet kryesore vendimmarrëse të PD nuk mund të përdoren si vegla të Kryetarit të partisë për të diktuar e kufizuar debatet.
“Institucionet kryesore vendimmarrëse të Partisë Demokratike nuk janë e nuk mund të përdoren si vegla të Kryetarit të Partisë për të diktuar e kufijëzuar ky i fundit drejtimin e debatit të brendshëm.
Rendi i ditës, temat dhe çështjet për diskutim në organet më të larta nuk mund të vendosen njëanshmërisht nga një individ i vetëm e aq më pak t’u komunikohen këto vendime anëtarëve të nderuar të Kryesisë dhe Këshillit Kombëtar nëpërmjet sekretareve personal të Kryetarit.
Anëtarët e Kryesisë dhe Këshillit Kombëtar nuk janë vartës të kryetarit, por të zgjedhur nga anëtarësia e partisë si përfaqësues të vullnetit të demokrateve dhe jo Kryetarit”, thuhet në një reagim të grupimit “Për PD”.
Pas zgjedhjeve të 25 prillit, ky grupim kërkoi dorëheqjen e kreut demokrat, Lulzim Basha, duke e bërë përgjegjësin kryesor për humbjen e zgjedhjeve të 25 prillit, pavarësisht se edhe ky grupim ka pranuar atë që konsiderohet si krim zgjedhor, përmes blerjes së votave.
