Një hotel në Pogradec përdorej për ushtrim prostitucioni. Këtë të Mërkurë, Policia njoftoi se në kuadër të operacionit të koduar “Restart”, ka vënë në pranga pronarin e hotelit, administratoren dhe dy vajza, një prej të cilave 17 vjeçe.
R.C., 35 vjeç, M.K., 34 vjeçe, E.Z., 36 vjeçe dhe M.S., 17 vjeçe, banues në Pogradec, janë arrestuar.
Operacioni i zhvilluar nga Komisariati i Policisë Pogradec dhe Sektori për Hetimin e Krimeve në Drejtorinë Vendore të Policisë Korçë, nën drejtimin e Prokurorisë Pogradec, erdhi pas disa javësh hetime.
Burime zyrtare njoftuan se, “në bazë të punës hetimore disajavore, provave të grumbulluara dhe kontrollit të ushtruar në një subjekt bar-kafe dhe hotel në Tushemisht-Pogradec, në pronësi të R.C., u arrit të dokumentohej se ky shtetas, në bashkëpunim me M.K. (në rolin e administratores) dhe dy shtetaset e tjera, në mënyrë të organizuar lejonin dhe ushtronin veprimtarinë e prostitucionit në ambientet e këtij hoteli”.
Nga verifikimet e mëtejshme rezultoi se M.K. nuk kishte kryer regjistrimin e subjektit pranë organeve tatimore, shtuan të njëjtat burime.
Akuzat që janë ngritur nga autoritetet janë për veprat penale “Prostitucioni”, “Shfrytëzimi i prostitucionit” kryer në bashkëpunim, “Mbajtja e lokaleve për prostitucion” dhe “Fshehja e të ardhurave”.
