Goditet nga rrufeja gjatë stërvitjes së futbollit, ndërron jetë i mituri

 

Një ngjarje e rëndë ka ndodhur në Angli, ku një 9-vjeçar ka mbetur i vdekur pasi u godit nga një rrufe. Mediat britanike shkruajnë se i mituri po luante në një fushë në zonën e Common Edge Road të Blackpool në momentin kur u godit nga një rrufe.

9-vjeçari është dërguar menjëherë në spital por nuk ka arritur të mbijetojë. Policia tha se megjithëse hetimet ishin ende në vazhdim, besohej se djali u godit nga rrufeja.

“Ky është një incident me të vërtetë shkatërrues dhe mendimet tona janë me gjithë zemër me familjen dhe miqtë e djalit të vogël që ka ndërruar jetë”, tha policia.

Ndërkohë që faqja e klubit ku i mituri luante, shkruan në Facebook: “Me keqardhje më të thellë duhet të raportojmë lajmin se djali i vogël i cili u godit nga rrufeja herët këtë mbrëmje ka ndërruar jetë fatkeqësisht. Si një klub, ne jemi zemër thyer dhe i shprehim ngushëllimet më të thella familjes së djalit.”