Katër persona janë arrestuar nga policia e Durrësit, që ka sekuestruar një sasi heroine.
Burime zyrtare nga policia bënë me dije këtë të Mërkurë se, në pranga janë vënë: Erges Shehi, 30 vjeç, Vilson Mimini, 29 vjeç (i dënuar më parë për korrupsion aktiv), Armando Gjoka, 55 vjeç, të tre banues në Durrës dhe Agron Baci, 52 vjeç, banues në Tiranë.
Sipas të njëjtave burime, specialistët për Hetimin e Narkotikëve, pas një informacioni të marrë në rrugë operative se Armando Gjoka kishte shkuar në zonën e Plazhit, me mjetin e tij taksi, së bashku me shtetasin Agron Baci (pasagjer), për të blerë një sasi lënde narkotike tek dy shtetas të tjerë, kanë organizuar punën për kapjen e tyre. Në momentin e konstatimit dhe të ndërhyrjes së Policisë, Erges Shehi dhe Vilson Mimini, të cilët posedonin lëndën narkotike, ndodheshin në një lokal në zonën e plazhit dhe sapo kanë vënë re prezencën e Policisë kanë kundërshtuar me dhunë dhe kanë tentuar të largohen, por janë neutralizuar dhe arrestuar nga Policia gjatë ndjekjes. Gjate tentativës për t’u larguar, këta shtetas kanë hedhur një pako, e cila më pas u konstatua si lëndë narkotike e llojit kokainë, me peshë rreth 900 gramë.
Gjatë operacionit u bë kapja dhe arrestimi edhe i dy shtetasve të tjerë, Armando Gjoka dhe Agron Baci, të cilët do blinin lëndën narkotike. Në cilësinë e provës materiale u sekuestrua lënda narkotike, automjeti taksi dhe 6 aparate celular.
Akuza që ka ndritur policia ndaj të arrestuarve është për veprën penale “Prodhimi dhe shitja e lëndëve narkotike”, kryer në bashkëpunim.
