Policia e Dibrës njoftoi se kishte filluar procedim penal ndaj minatorit, që përfundoi në spital pas asfiksimit nga gazi. Një përfaqësues i kompanisë mohoi përgjegjësinë për rastin.
Policia e Dibrës njoftoi se kishte filluar procedim penal ndaj njërit prej punëtorëve të aksidentuar në galeritë e kromit në Martanesh. Minatori Shyqyri Elezi 53 vjeç, i cili ishte duke salduar brenda në galeri dhe si pasojë e gazit të çliruar nga gjeneratori është asfiksuar, do të ndiqet penalisht për “shkelje të rregullave të mbrojtjes në punë”.
Në aksident mbetën të asfiksuar edhe dy minatorët e tjerë A. J., dhe M. H., të cilët ndërhynë për të shpëtuar Elezin. Policia njoftoi se procedimi penal ndaj minatorit do të bëhej pa masë sigurie, ndërkohë që Elezi, ndodhet i shtruar në spital në Tiranë pas aksidentit.
Në një deklaratë për shtyp, Sindikata e Bashkuar e Minatorëve të Bulqizës deklaroi se saldimin në një zonë të papërshtatshme, minatorët fillimisht kanë refuzuar të punojnë, por janë detyruar ta bëjnë nga përgjegjësit e tyre. “Edhe në këtë rast, puna në kushte të rënda dhe mungesa e të drejtave elementare për pak prodhoi një tragjedi.” thuhet në reagimin e SMBB, që akuzon kompaninë për aksidentin.
Një përfaqësues i kompanisë Xhireton Shpk, i kontaktuar në telefon i tha BIRN se kompania nuk kishte “asnjë sqarim për të dhënë përpos atyre se çfarë janë thënë nga policia”. Kompania mohoi akuzat se i ka detyruar punëtorët që të saldojnë brenda në galeri me gjenerator.
Kushtet e sigurisë në galeritë e nxjerrjes së kromit janë problematike prej vitesh, ndërsa qarku Dibër renditet pas Tiranës për numrin e të vrarëve në aksidente në punë.
Pesë të vdekur dhe 28 të plagosur u raportuan gjatë vitit 2020 vetëm në minierat e që ushtrojnë aktivitet në qarkun e Dibrës. Ndërkohë në fillim të vitit 2021 një person humbi jetën në galeritë e kontrolluara nga kompania “KACI – IF – 2012” shpk në Bulqizë.
BIRN ka gjetur në një sërë investigimesh të mëparshme se çështje për aksidente të ngjashme pushohen pa u hetuar dhe se edhe kur ka hetime faji u lihet kryesisht viktimave dhe punëtorëve të aksidentuar. Ndërkohë në dy procese ndaj prokurorëve që kishin punuar në zonën e Dibrës Vëzhguesit Ndërkombëtar gjetën shkelje të rënda pikërisht mbi hetimet sa i përket këtyre rasteve. Të dy prokurorët u penalizuan për hetimet të cekëta që shpesh ishin mbyllur pa ekspertiza. /BIRN/
