Një ditë më parë në Shqipëri u festua dita e Drejtësisë, ndërsa drejtues të institucioneve të reja të drejtësisë, ministrja e Drejtësisë, Etilda Gjonaj, deputetë të Rilindjes, dhe përfaqësues të Trupit Diplomatik, u mblodhën në një aktivitet të organizuar nga KLP.
Një aktivitet rutinë ku çdokush nga ata që morën fjalën, foli për drejtësinë e re, për pritshmëritë dhe për konsolidimin e institucioneve.
Por mes të ftuarve ishte edhe hetuesi i Sigurimit të Shtetit, Odhise Porodini. Një emër ndoshta i panjohur për brezin e ri, për diplomatët e akkredituar në Tiranë, por shumë i njohur nga ata që sot janë pjesë e institucioneve të reja të drejtësisë. Por jo vetëm! Porodini është i njohur edhe për shtresat e ish-të përndjekurve politikë, të cilët i ka torturuar, burgosur e pushkatuar. Dhe rasti më flagrant është ai i pushkatimit të poetit Trifon Xhagjika.
Gazetari Nebil Çika, i cili drejton edhe shoqatën e ish-të përndjekurve anti-komunistë, ka publikuar në rrjetet sociale, disa dokumente, ndërsa ironizon pjesëmarrjen e Porodinit në një ceremoni të tillë, përkrah ambasadores amerikane, Yuri Kim.
“Dje në ditën kombëtarë të Drejtësisë i ftuari i nderit, përveç ambasadores Amerikane Yuri Kim ishte edhe ish hetuesi i Sigurimit të Shtetit, Odhise Porodini, xhelati që ka torturuar, burgosur e pushkatuar me qindra të burgosur polikë antikomunistë ku spikat pushkatimi i poetit Trifon Xagjika. Ai ka vlerësuar madje me shkrim reformën ne drejtësi.
Kujt ja priste mendja në diktaturën komuniste një hetues, xhelat i sigurimit të shtetit që pushkatonte e torturonte pro-amerikanët antikomunistë shqiptarë do ndante tani të njëjtin mendim e vlerësim për drejtësinë shqiptare me ambasadoren e SHBA”, shkruan Çika.
