Gjykata e Tiranës liron nga qelia Alban Voglin, president i Kastriotit dhe Gazmend Voglin, administrator i klubit të futbollit.
Për Alban Voglin gjykata caktoi masën “detyrim për paraqitje”, ndërsa për Gazmend Voglin “arrest në shtëpi”.
Presidenti i Kastriotit, Alban Vogli dhe Drejtori Teknik i ekipit, Gazmend Vogli u arrestuan pas trazirave të ndodhura në ndeshjen e 8 Majit Tirana-Kastrioti, që përfundoi 1-0 për kryeqytetasit.
Policia konfirmoi të Dielën akuzat ndaj tyre për veprat penale “Kundërshtim i punonjësit të policisë së rendit publik” e kryer në bashkëpunim dhe “Veprime të dhunshme në aktivitete sportive” të kryera në bashkëpunim.
“Tek stadiumi ‘Selman Stërmasi’, gjatë zhvillimit të ndeshjes Tirana – Kastrioti, këta shtetas në bashkëpunim me njëri tjetrin, kanë hyrë në fushën e lojës duke shkaktuar tension dhe ndërprerjen e ndeshjes për disa minuta dhe më pas kanë goditur dy punonjës policie për të shmangur shoqërimin e tyre”, njoftoi policia.
Tensionet u krijuan pas goli të realizuar nga Hoxhallari në minutën 78-të. Drejtuesit e Kastriotit pretenduan se futbollistët e Tiranës nuk respektuan “Fair–Play”-n teksa një lojtar i krutanëve ndodhej i shtrirë në fushë.
Alban Vogli është arrestuar edhe më herët për një rast të ngjashëm. Në vitin 2016, 34-vjeçari u vu në pranga pas akuzave se goditi me mjete të forta një gazetar sportiv që më herët pati ekspozuar dhunën e Presidentit në ndeshjen e Kastriotit me Korabin, e vlefshme për Kategorinë e Parë.
