Dashamir Shehi, kryetar i LZHK, i cili në zgjedhjet e 25 prillit kandidonte në Tiranë për deputet si pjesë e koalicionit PD-AN, shprehet se analiza për rezultatin zgjedhor nuk mund të bëhet e përciptë.
Shehi këshillon demokratët që të angazhohen në një proces për një hapje të madhe të Partisë Demokratike, madje duke sugjeruar një rithemelim të saj.
Dhe për këtë, Shehi shprehet se PD nuk ka pse të zhvilloje zgjedhjet e brendshme në korrik, por ato mund të shtyhen me 6 muaj, duke i dhënë mundësi kandidatëve që të dalin, të shpalosin programet e tyre.
“Unë jam i idesë që të bëhet një hapje e madhe. Të shpallet një datë për kongresin e ri dhe për 6 muaj të dalin pretendentët e rinj, por nuk dilet brenda 48 orëve se edhe xhanazja do 40 ditë. Unë besoj se një proces i tillë i bën mirë një Partia Demokratike”, thekson Shehi.
Referuar zhvillimeve politike, kreu i LZHK shprehet se si Edi Rama dhe Lulzim Basha bënë një fushatë individuale, pra zgjodhën një model të ngjashëm me atë të SHBA.
“Këtu fushata u përqëndrua te individët, njëlloj si zgjedhjet presidenciale në SHBA, atëherë mendoj se edhe organizimi i partive, duhet të bëhet në këtë drejtim. Kandidatët apo pretendentën për kryetar partie duhet të kenë kohën dhe gjithçka tjetër në dispozicion për të bërë ato takimet në rrethe, pra një lloj primaresh brenda partisë. Të prezantohen programet që ato kanë, objektivat, të ketë një përballje idesh dhe kjo nuk mund të bëhet as për 1 muaj apo 40 ditë”, tha Shehi.
