Dy persona janë arrestuar nga policia e Tiranës pasi akuzohen se merrnin kredi në subjekte financiare që japin mikrokredi, me dokumente të falsifikuara.
Burime zyrtare bëjnë me dije se në pranga u vunë, Sh.Rr., 25 vjeçe dhe L.A., 27 vjeç, të dy banues në Tiranë.
Ata kishin krijuar një skemë mashtrimi, me anë të së cilës rekrutonin persona të ndryshëm, kundrejt shpërblimit, duke i pajisur me dokumente të dyshuara të falsifikuara, për të bërë të mundur përfitimin e mikrokredive nga këto institucione financiare.
“Nën drejtimin e Prokurorisë vijon puna për identifikimin dhe vënien para drejtësisë edhe të personave të tjerë të përfshirë në këtë skemë mashtrimi. Materialet i kaluan Prokurorisë pranë Gjykatës së Shkallës së Parë Tiranë, për veprat penale ‘Falsifikim i dokumenteve’, ‘Mashtrimi’ dhe ‘Mashtrim me kredi’”, njoftoi policia.
