VIDEO/ PD depoziton në KQZ ankimimin për përsëritjen e zgjedhjeve në 9 qarqe

Partia Demokratike depozitoi në KQZ ankimimin e saj lidhur me shpalljen të pavlefshëm të zgjedhjeve në 9 qarqe, me përjashtim të Kukësit, Dibrës dhe Shkodrës.

Përfaqësues të PD deklaruan se kanë depozituar dosjet që sipas tyre përmbajnë fakte dhe prova mbi atë që e konsiderojnë si masakra me votën në zgjedhjet e 25 prillit.

Sipas demokratëve, kjo nuk është betejë vetëm e PD, por e të gjithë shqiptarëve kundër regjimit Rama-Doshi-Rakipi, që akuzohen nga demokratët si manipuluesit e zgjedhjeve të 25 prillit.

“Kemi paraqitur faktet dhe provat, të mbledhura në çdo qark mbi deformimin e vullnetit të zgjedhësve, ku përgjegjësi ka edhe KAS, i cili me urdhër të Edi Ramës, miratoi atë model fletë-votimi me numra, që bëri shpalljen të pavlefshme të mbi 83 mijë fletëvotimesh”, thanë përfaqësues të PD.

“Procesi i 25 prillit ishte një masakër elektorale e orkestruar dhe zbatuar nga regjimi Rama-Doshi-Rakipi. Viktimat e kësaj masakre elektorale janë shqiptarët dhe familjet e tyre. Detyra e Partisë Demokratike është të qëndrojmë fort dhe të vendosur dhe të luftojmë me të gjitha fuqitë për kthimin e demokracisë në vend.

Sot, ne po dorëzojmë në KQZ qindra prova fakte dhe të dhëna që provojnë tjetërsimin e vullnetit tê shqiptarëve dhe vjedhjen më të madhe të zgjedhjeve në Shqipëri.

Nga blerja e votave dhe presioni ndaj votuesve, tek vjedhja e të dhënave personale të qytetarëve nga partia-shtet dhe përdorimi i tyre për presione kriminale nga sistemi i patronazhisteve te partise shtet”, thuhet në deklaratën e Marinela Ziut dhe Marash Logut, përfaqësuesve të PD, që depozituan ankimimet në KQZ.

Në dosjet e fakteve dhe provave, sipas demokratëve, përfshihen edhe angazhimi i shtetit dhe administratës, tenderat, punësimet, legalizimet dhe pagesat e paligjshme për të blerë vota.

“Siç e pamë gjatë zgjedhjeve, regjimi Rama-Doshi sundon gjithë sistemin shtetëror në vend, dhe e përdor atë për përfitimet e tij politike. Këtu përfshihet edhe KAS i cili vendosi fletën e votimit sipas urdhrit politik të Edi Ramës. Por është detyra jonë të shpalosim gjithë dëshmitë dhe dokumentet që kemi dhe të vazhdojmë betejën për të vërtetën dhe për qytetarët shqiptarë në të gjitha frontet, mënyrat dhe mundësitë që ekzistojnë”, thuhet në deklaratë.