Tre persona të një familjeje nga Gjilani humbën jetën në Shqipëri si pasojë e helmimit. Nga raportimet dyshimet e para janë se familjarët humbën jetën njëri-pas tjetrit, brenda 24 orësh, si pasojë e helmimit nga ushqimi ose këpurdhat.
Por, djali i familjes, i cili humbi në këtë tragjedi, prindërit dhe gjyshen, ka ngritur dyshime, lidhur me shkaqet e vdekjes së të afërmve të tij.
Ai akuzon ekipin mjekësor të Manzës se nuk ka kryer trajtimet e duhura mjekësore lidhur me gjendjen e rënduar të familjarëve të tij, ndërsa shprehet se ka ngordhur edhe qeni, që ndodhej në banesën që familja nga Gjilani kishte në pronësi në Gjirin e Lalzit.
“Shqetësuese për ne është neglizhenca dhe mostrajtimi i duhur në shërbimin shëndetësor të Manzës. Tre pacientë me të njëjtat simptoma, lejohen të kthehen në banesë duke i dhënë disa medikamente. Pa analiza, më duket që është diçka jo e duhur për çdo mjek që i thotë vetes mjek.
Ka thënë që kanë qenë në spital, kanë kaluar vetëm me një serum dhe i kanë liruar kanë ardhur në shtëpi me barna. Gjendja ka qenë e rëndë. Nuk mund të lirohet pacienti në atë mënyrë. Sikur të ishte vetëm një hajde. Por tre pacientë me simptoma të njëjta. Kjo është e pakuptueshme.
Është shumë herët për të folur. Policia ka filluar hetimet. Mjekësia ligjore ka për të thënë fjalën e vet. Procedurat janë kryer. Kjo është sipas atyre, e konsideruar si vdekje e dyshimtë.
Problemi që më shqetëson është se ne e kemi pasur edhe një qen. Pse vdiq qeni? Familjarët e dinë që ushqimin që konsumon familja nuk e ha qeni.
Ne nuk dimë qe qeni konsumon kërpurdha. Ata mbledhin kërpurdha gjatë gjithë kohës. Babi ka dalë se ka pasur dëshirë me ecur nëpër male. Mami i ka njohur shumë mirë kërpurdhat se është rritur në fshat”, tha ai.
