Tre persona janë arrestuar dhe tre të tjerë janë shpallur në kërkim pas zbulimit të një godine në Krutje të Lushnjes, ku kultivohej kanabis.
Policia informon se u bë arrestimi në flagrancë i Mario Çelës 40 vjeç, banues në Lushnje, si dhe u shpallën në kërkim: Ervin Rista 45 vjeç, banues në Tiranë, Lirim Serdani 54 vjeç dhe Igli Borova, 27 vjeç, banues në Fier.
Këta persona akuzohen se në bashkëpunim me njëri tjetrin, kanë përshtatur ambientin e një ndërtese në pronësi të shtetasit E.R., me aparatura që shërbejnë për kultivimin e bimëve narkotike.
Gjithashtu, u arrestuan për veprën penale “Shpërdorim detyre” dy punonjës së OSHEE-së: Mestan Zoto, 64 vjeç, banues në fshatin Ardenicë dhe Vilsi Liçi, 23 vjeç, banues në fshatin Gorre. Ata akuzohen se në kundërshtim me ligjin nuk kanë përmbushur detyrën, duke mos kontrolluar linjën elektrike, si dhe matësin e energjisë elektrike.
Gjatë operacionit, shërbimet e Policisë kanë sekuestruar në cilësinë e provës materiale pajisjet elektrike që kanë shërbyer për kultivimin e bimëve narkotike dhe fidanë të dyshuar narkotikë kanabis, të kultivuar në kushte laboratorike.
Gjithashtu gjatë kontrollit të banesës së Lirim Serdanit u gjetën dhe u sekuestruan disa fishekë luftarak dhe pajisje që shërbenin për kultivimin e bimëve narkotike në kushte laboratorike.
Materialet për veprime të mëtejshme do i kalojnë Prokurorisë Lushnjë, për veprat penale “Kultivimi i bimëve narkotike”, “Shpërdorim detyre”, “Vjedhja e energjisë elektrike” dhe “Prodhimi dhe mbajtja pa leje e armëve dhe municionit luftarak”, njoftoi policia.
