Partia Demokratike ka përfunduar hartimin e një dokumenti voluminoz, i cili pritet të depozitohet në KAS, lidhur me procesin zgjedhor të 25 prillit.
Demokratët kërkojnë shpalljen të pavlefshme të zgjedhjeve në 9 qarqe, me përashtim të Dibrës, Lezhës dhe Kukësit, ndërsa kërkohet ripërsëritja e zgjedhjeve në Shkodër, Durrës, Tiranë, Elbasan, Fier, Berat, Gjirokastër, Korçë dhe Vlorë.
Në dokument përfshihen të gjitha parregullsitë e evidentuara para, ditën e zgjedhjeve dhe gjatë procesit të numërimit, ndërsa theksi vihet në tjetërsimin e vullnetit të zgjedhësve përmes shit-blerjes së votave, pëërdorimit të administratës, presioneve dhe shantazheve, si dhe angazhimit të institucioneve vendore dhe qendrore, veçanërisht në proceset që kanë të bëjnë me pronat dhe legalizimet, dëmshpërblimet apo pagesat në kuadrin e procesit të rindërtimit.
Nga raportimet mësohet se në dokumentin e plotë të hartuarnga ekspertët ligjorë të PD-së, por edhe ekspertët e IT-së, përfshihen edhe punësimet e fundit në administratë në tre muajt e fundit, dyfishimi i ndihmës ekonomike apo përdorimi i aseteve shtetërore në zgjedhje.
Ankimimi i PD-së në KAS do të bëjë automatikisht që KQZ-ja të shtyjë me të paktën 20 ditë shpalljen e rezultatit përfundimtar të zgjedhjeve të 25 prillit.
LSI ka kërkuar shpallje të pavlefshme të procesit të votimit vetëm për qarkun e Gjirokastrës, qark në të cilin nuk arriti të sigurojë asnjë mandat.
Komisioni Qendror i Zgjedhjeve në rezultatin paraprak për 25 prillit i jep Partisë Socialiste 74 mandate, PD-së 59 mandate, LSI-së 4 mandate dhe PSD-së 3 mandate.
Mësohet se i gjithë materiali i mbledhur, ku përfshihen edhe emrat konkretë të personave të përfshirë në atë që opozita e konsideron si krim zgjedhor, do të përkthehet dhe do të vihet në dispozicion jo vetëm të Trupit Diplomatik, por edhe institucioneve ndërkombëtare në Bruksel dhe Uashington, sikundër edhe në kancelaritë e secilit prej vendeve të BE, grupimet parlamentare në Parlamentin Europian, por edhe Bundestagut.
Duket se demokratët do të angazhohen në një proces të ngjashëm me atë të 20 viteve më parë, ku pas zgjedhjeve parlamentare të 2001, u angazhuan në denoncimet e manipulimeve zgjedhore, çka detyroi në atë kohë mazhorancën e drejtuar nga Fatos Nano dhe Ilir Meta që të kishin si të legjitimuar vetëm 71 vota, ndërsa pothuajse të gjitha institucionet që kërkonin shumicë të cilësuar u zgjodhën me konsensusin e opozitës.
