“Me rebelët merremi më vonë”, Barcelona reagon ndaj deklaratës së UEFA-s

Super League, pas “Deklaratës së Angazhimeve të Klubeve”, tashmë është një ëndërr, ndërkohë që tre klubet që nuk janë tërhequr, Barcelona, Real Madrid dhe Juventusi me shumë mundësi do të dënohen, pasi nuk pranuan të bashkohen me 9 klubet e tjera europiane.

Ceferin ditën e sotme u shpreh se më vonë do të merren masa ndaj këtyre klubeve: “UEFA ka vendosur të shkruajë një kapitull të ri dhe të ecë përpara me një frymë pozitive. Klubet e pranuan se gabuan, masat e ndërmarra janë domethënëse. Asnjë nga gjobat nuk do të mbahet nga UEFA, por do të investohen tek të rinjtë dhe në futbollin bazë në komunitetet lokale në Europë dhe Mbretërinë e Bashkuar.

Klubet i pranuan gabimet dhe reaguan dhe treguan angazhimin e tyre për të ardhmen e futbollit europian. E njëjta gjë nuk mund të thuhet për klubet që mbeten të përfshira në të ashtuquajturën Super League. UEFA do të merret më pas me ato klube”. Kjo deklaratë nuk u ka pëlqyer katalanasve.

Mundo Deportivo shkruan se Barcelona ditën e nesërme do të dalë me një deklaratë, pas asaj që Ceferin ka deklaruar. Në kampin katalanas e konsiderojnë si mungesë respekti dhe të papranueshme, ndaj edhe do të mbajnë qëndrim.