Gjykata e Posaçme e Apelit ka hequr sekuestron për kompjuterat dhe serverat e Lapsi.al, media që publikoi “skandalin” e patronazhistëve të PS, që përdornin të dhënat personale të qytetarëve.
Më herët, Gjykata e Posaçme pranoi një kërkesë të SPAK për sekuestrimin e pajimeve të gazetarëve, si pjesë e hetimit për databazën me të dhëna personale të votuesve të Tiranës.
Vendimi i kësaj të Enjteje për heqjen e sekuestros vjen pasi Gjykata Evropiane e të Drejtave të Njeriut urdhëroi Shqipërinë të mos zbatojë urdhrin për sekuestrimin e pajisjeve elektronike të publikimit online Lapsi.al.
“Patronazhistët”/ Strasburgu rrëzon SPAK për sekuestron ndaj “Lapsi.al”
Avokati i portalit, Dorian Matlija tha në një prononcim për gazetarët pas seancës se, deri më tani, SPAK nuk ka marrë në pyetje asnjë patronazhist, apo të drejtohet në subjektin politik për të cilin thuhet se është i përfshirë në publikimin e të dhënave (PS).
“Kjo është një çështje e freskët. Ky është një zhvillim i ri i gjykatës Evropiane dhe është marrë edhe nga apeli këtu. Deri tani nuk ka asnjë informacion apo pretendim nga ana e SPAK. Në fund të fundit, nuk rezulton që SPAK të ketë thërritur patronazhistët, të shkonte tek subjekti politik që dyshohet se ka pasur këtë databazë”, tha Matlija.
