Disa ndërtesa janë shembur këtë të Martë në Durrës, ndërkohë që banorët kanë protestuar, duke u shprehur se nuk janë njoftuar. Ata shtuan se janë të befasuar nga kjo ndodhi, për më tepër që votuan për Partinë Socialiste në zgjedhjet parlamentare të 25 Prillit.
Godinat e shembura, banesa e biznese, janë në zonën e ish-Kënetës. Aty, prej disa vitesh ka filluar një investim për projektin që ka për qëllim ndërtimin e një rruge.
Pronarët janë shprehur për mediat se kanë mësuar që pronat e tyre do shembeshin vetëm këtë të Martë, ditën kur edhe fadromat kanë nisur punën për shembjen e objekteve. Ata janë ngritur në protestë duke kundërshtuar shembjen e bizneseve dhe banesave.
Pronarët janë shprehur se lidhur me këtë projekt nuk kanë marrë asnjë njoftim zyrtar dhe nuk dinë si do të zhvillohet ndërtimi i rrugës dhe se në këtë mënyrë nuk dihet fati i objekteve të tyre.
Ata thanë po ashtu për gazetarët se ishin votues të Partisë Socialiste dhe nuk e prisnin shembjen e pronave të tyre.
