Një tjetër artikull nga një gazetë e huaj i është kushtuar vendit tonë, duke nxjerrë në pah dështimet në fusha të ndryshme të qeverisë Rama, sidomos ato në reformën në drejtësi dhe luftës kundër krimit e korrupsionit.
Një artikull i gazetës franceze ‘Le Figaro’ shkruar nga Thierry Portes, reporter i gazetës prestigjioze, prek reformën në drejtësi – që nga diplomatët përcaktohet si ‘reforma e reformave’.
“Ndërkohë që popullata është e zemëruar nga ngadalësia e procedurave dhe shfaq padurim për të parë më në fund goditjen ndaj banditëve të famshëm, krimi i organizuar dhe rrjetet e korrupsionit – dy fusha në të cilat Shqipëria shkëlqen – janë të vetmet që përfitojnë nga një reformë që supozohej se do t’i ndëshkonte”, shkruhet në artikull.
Në shkrim përmenden dhe dështime të SPAK, teksa magjistratës e Prokurorisë së Posaçme nuk kanë pranuar të prononcohen për gazetarin francez.
“Është e vërtetë që SPAK do të diskreditohej përfundimisht nëse një prej të goditurve të tij të parë nuk do të qe një pjestar i elitës politike, në mënyrë që popullatës t’i rikthehej besimi te drejtësia”, shkruan gazetari francez.
Në artikull flitet edhe për ndërtesat që po ndërtohen në Tiranë, për të cilat raportohet se po përdoren për pastrimin e parave të krimit dhe të korrupsionit.
“Dhe për sa kohë që të përzgjedhurit e rinj të reformës nuk do të vendosin ligjin dhe drejtësinë, rrokaqiejt që pastrojnë paratë e drogës dhe korrupsionit do të vazhdojnë të ngrihen në qiellin e Tiranës”, e mbyll artikullin Thierry Portes.
