Kandidati i pavarur në zgjedhjet e 25 prillit, Elton Debreshi, është shprehur, se në qarkun e Dibrës është bërë një fushatë e pabarabartë dhe e padrejtë, pasi votuesit u vunë nën presion dhe u shantazhuan me heqje nga puna, e deri në heqje të ndihmës ekonomike.
“Për ne është një mesazh i fuqishëm për qarkun tonë. E pamë mirë ditët e fundit si u bë fushata në Dibër, me shantazhe për blerje vote dhe presion në vendet e punës. Bënë presion edhe tek ndihma ekonomike. Nuk e shoh humbje, por fitore të thellë për ne”,- tha Debreshi.
Megjithatë Debreshit thekson, se 590 votat e marra nga ai në qarkun Dibër janë shumë më të vlefshme se shumë vota të blera, ndaj nuk e konsideron humbje, por një fushatë të jashtëzakonshme.
“Ato 590 vota që i kemi marrë në Dibër kanë qenë 590 trima që u përballën me presionin e partive politike. Fushata jonë ka qenë e jashtëzakonshme. Kemi takuar njerëz me të njëjtat halle me ne, njerëz punëtorë të lënë në harresë sidomos në fshatra të thella”,- përfundoi ai.
