Gazetari Jack Parrock ka ndarë në Twitter një ‘breaking news’, siç e ka quajtur ai, çeljen e dritës jeshile për caktimin e Konferencës Ndërqeveritare për hapjen e negociatave të Shqipërisë me BE-në.
Sipas tij pritet që kjo konferencë të mbahet në qershor në samitin e liderëve të Bashkimit Evropian.
“LAJM I FUNDIT: Komisioni i BE do të propozojë një lëvizje të madhe përpara për procesin e pranimit për Shqipërinë.
Burimet më thonë se Komisioni do të rekomandojë mbajtjen e Konferencës së parë Ndërqeveritare në samitin e qershorit të liderëve të BE”, shkruan Parrock.
Shqipëria pret konferencën e radhës për çeljen e negociatave me BE-në, pas disa vitesh refuzim si dhe një viti të gjatë pandemie e cila bllokoi çdo proces.
Në fund të 2019-s vendi ynë u përball me një shtim të listës së kritereve që duheshin plotësuar, ndërsa vendi ishte në përplasje të plotë mes palëve politike me protestat e vazhdueshme të opozitës, djegien e mandateve prej saj si dhe mbajtjen e zgjedhjeve vendore monopartiake.
Nuk dihet nëse zgjedhjet e 25 prillit do të ndihmojnë ose jo Qeverinë Rama në hapjen e negociatave, ndërsa opozita po paraqet kontestimet e saj për procesin, veçanërisht sa i takon shit-blerjes së votave, intimidimit dhe presioneve ndaj votuesve.
