Tirana barazoi sot pa gola në transfertë kundër Bylisit, rezultat që nuk i shkon për shtat bardhebluve për objektivat e vetë skuadrës. Pas takimit foli trajneri Orges Shehi, i cili nuk ishte i kënaqur me rezultatin 0-0.
Sa i përket lojës, bardheblutë performuan mirë dhe i këtij mendimi është tekniku i njohur. Në fjalën e tij për Supersport, ai deklaroi:
“Për të dalë me 3 pikë duhet të shënonim. Nuk bëmë një lojë brilante, por futet te ndeshjet e mira. Është futboll dhe në futboll pranohen shumë gjëra.
Rasti i Seferit? Mund të ishte zgjidhur më mirë, por nuk analizoj gabimet individuale. Duhej të ishte interpretuar më mirë. Nëse do të kishim shënuar, do na lehtësohej puna shuma. Nëse të vjen prap ai rast i thashë, shërbe menjëherë për Torasën.
Kundërshtarët? Unë mendoj që Kukësi nuk hyn në ndeshjet e vështira sepse të lë të luash. Skënderbeu dhe Bylis janë ekipe që mendojnë të mbrohen. Në një rast të vetëm duhet të shënosh. Më pas gjithçka bëhet më e lehtë. Duhet ta kishim zgjidhur me rastin e parë që më pas të na bëhej më e lehtë.
Individualizmi? Duhet të shërbejmë për njëri-tjetrin. Ato raste që na jepen duhet t’i finalizojmë. Këto janë mënyrat e vetme për t’i zgjidhur. Një rast të mbyll ndeshjen. Kalojnë minutat bëhet më e vështirë. Konstatimi është i drejtë që duhet të shërbejmë. Në fund të lojës besoj se do ta kishte zgjidhur ndryshe, por duke qenë fillimi, mendojnë se kanë shumë minuta para”, përfundoi ai.
