Astrit Patozi është dorëhequr nga posti i kryetarit të Partisë Bindja Demokratike. Përmes një mesazhi në rrjetet sociale, Patozi shkruan se merr përgjegjësitë dhe dorëhiqet nga drejtimi i partisë.
“Duke falenderuar edhe një herë kandidatët, mbështetësit dhe të gjithë votuesit e Bindjes Demokratike në zgjedhjet e 25 prillit, kam vendosur të marrë të gjitha përgjegjësitë për mosarritjen e objektivave tona elektorale dhe të dorëhiqem nga drejtimi i partisë.
Fakti që ne bëmë një betejë dinjitoze dhe qytetare, në mesin e një polarizimi ekstrem, që erdhi nga egërsia dhe ashpërsia e forcave kryesore politike, nuk mund të shërbejë në asnjë rast si justifikim për askënd prej nesh, por sidomos për mua që udhëhoqa fushatën. E kemi ditur që në fillim se në kohë lufte njerëzit nuk kanë mundësi të dëgjojnë muzikë, por nuk kemi ndërmend të fshihemi prapa rrethanave të vështira dhe të pazakonta”, shkruan Patozi.
Në zgjedhjet e fundit parlamentare, ato të 25 prillit, partia e drejtuar nga Patozi dështoi, ndërsa asnjë prej kandidatëve të saj jo vetëm nuk arriti të marrë mandatin e deputetit, por edhe me votat preferenciale zhgënjyen. Rezultatet e arritura prodhuan meme dhe humor në rrjetet sociale, ku kandidatët e Bindjes krahasoheshin me ato të admministratorëve të pallateve, referuar numrit të votave preferenciale.
Bindja Demokratike konsiderohej si një patericë e Edi Ramës, bashkë me partinë e themeluar nga Jozefina Topalli, e cila u dorëhoq pas zgjedhjeve.
